غُض عقلك

لأول وهله قد تستعجب من عنوان هذا المقال, لأن المعتاد والمتوارث عليه سواء كان من ديننا او من تقاليدنا هو غض البصر,

فى الحقيقه هذا ما أنوى التحدث عنه فى هذا المقال, و لكن من منظور مختلف فى الحقيقه هو منظورى الشخصى,

وكأى وجهة نظر او نظريه فى الوجود فهى تحتمل الخطأ أو الصواب, وإن كنت انا لا أفكر بمنظور الخطأ والصواب 

والذى جعلنى أفكر بهذا المنظور هو الظروف المجتمعيه التى تلح على الأفراد وتعطى صافرة الإنذار لوجود مشكله حقيقيه بدأت تتفشى مجتمعنا, 

ناهيك عن كل هذا ودعونا نتحدث فى لُب الموضوع.

غض البصر هو من الأوامر الصريحه فى القرأن :

(قل للمؤمنين يغضوا من أبصارهم و يحفظوا فروجهم ذلك أزكى لهم إن الله خبير بما يصنعون) سورة النور ، آية 30

 أتعلمت فى المدرسه من مدرسين العربى والدين, ومن شيخى الى كان بيعلمنى القران انا وأخويا , وخطيب المسجد فى خطبة الجمعه, 

أن غض البصر هو شىء واجب وأن النظره سهم من سهام الشيطان, والنظره هى أول الطريق الى الفساد والزنا, وأن المرأه كلها مفاتن وأنها الفخ الذى يتربص بك اينما كنت, دائماً وابداً أحذر المرأه,

 وجهة نظر منطقيه, وفعلا اقتنعت بيها,

لكن الأسئله بدأت تنزل زى المطرعلى رأس مدرس اللغه العربيه..ولو النظره من غير قصد ؟؟!!

فكان يجيب ان النظره الأولى هى جائزه حتى تتنحى بعينك بعيداً, وكانت اجابه منطقيه هى كمان واقتنعت بيها,كفايه كلام وحان وقت التنفيذ, 

وفعلا أبتديت انفذ الى اقتنعت بيه كنت بمشى فى الشارع موطى رأسى وكل ما عينى وقعت على بنت او ست أبص بعيد عنها, كان الموقف اشبه بأنى اراقب افكارى, 

جربت ان تراقب افكارك قبل كده ؟؟!!.. غالباً هتتجنن,

المرأه فى كل مكان, ولاحظت ان من ساعة ما حاولت أغض بصرى أن المرأه مش قدام عينى ولكن يتشبع بها عقلى,

فأنا دايما عندى حذر ان تقع عينى على مرأه, دايما بفكر انى مش عايز أشوف ست او بنت, واستسلمت, الجنون احسنلى من انى امشى فى الشارع عامل زى المرووش ومش عارف اركز فى حاجه,

فأطلقت النظر تانى ولكن المره ديه المرأه عقلى لسه بيتشبع بيها ولما اطلقت عينى عينى بقت بتدور عليها فى كل مكان, وأصبح الهوس بالمرأه موجود برضه ولكن مش عشان مشوفهاش لاء عشان اشوفها,

انا مش  مضطر أنى اتابع معاك تطورات الى هيحصل لصاحبنا المهوس بالنساء, لأنك عارف كويس الى هيحصل بعد كده, 

لأنك ممكن تكون مريت بنفس التجربه أو على أقل تقدير بتشوف العشرات منها يومياً,

فالهوس بالنساء, يتحول الى هوس بالجنس, وما أدراك بالعقل وخيالات العقل, فلو أفنيت نساء العالم كله فعقل الرجل فيه نساء اضعاف نساء العالم كلهم, هوهيزين ليك اى شىء وكل شىء فى سبيل انه يعملك الى بتدور عليه او الى انت مهووس بيه

وفى مجتمعنا بيلوم الشاب النساء كلهم على التأمر عليه و أنهم بيفتنوه بلبسهم أو بجمالهم, ويكون الحل الوحيد أمامه هو التحرش

وهو مظلوم فهو بيعانى من كبت وجملته المشهوره "هى ايه الى ملبسها كده, ايه الى نزلها كده من بيتها"

لكن الغريب أنه مش الشاب وحده الى بيعمل كده, فالمتجوز والمتعلم والعجوز والغنى, هى اصبحت ثقافه,

بالظبط الى بحاول انى أقنعك بيه دلوقتى يا صديقى ان سبب التحرش والهوس الجنسى الى بيعانى منه مجتمعنا دلوقتى هو التربيه الدينيه الخاطئه, او المفاهيم الدينيه زى ان المرأه عوره وانها كلها مفاتن وأنك لا حول ولا قوة ليك والمرأه بإديها مفاتيح شهوتك 
 وهوسك,

علمياً من وظائف الأدراك انه بيعمل حاجه اسمها "deletion" او حذف وديه معناها ببساطه انه بيحذف جزء من الحاجات الى انت مدركها,

 كلنا مرينا بالموقف ده, انك تبقى شايل مفاتيحك وبتدور عليها او انك لابس نضارتك وبتدور عليها, فى اللحظه ديه عقلك عامل حاجه اسمها حذف من الأدراك, 

أيه سبب الى انا بقوله ده ؟؟!!

السبب بسيط جدا ان عقلك فيه وظيفه انه يحذف كل ما هو بيثير شهوتك وغرائزك وممكن تستخدم الوظيفه ديه لو انت عايز كده,

فى ناس هتقولى انت خيالى جدا وايه الى انت بتقوله ده ,هقولك مثال بسيط جدا

أهلك الى فى البيت اختك او والدتك ليه مش بيثيروك جنسياً ؟؟!! ببساطه لأنك عامل عملية حذف لأثارتهم الجنسيه

وعشان متقوليش ديه فطره واننا اتولدنا كده, مثال تانى قابيل وهابيل اتجوزو من أخواتهم بس مش نفس البطن, ده معناه ان عملية الحذف بأيدك,

من وجهة نظرى أن هو ده غض البصر المقصود فى الأسلام وهو غض العقل بمعنى أن الجنس والشهوه أصلا مش فى دماغك أو ليهم مخرج واحد وهو الجواز, وغير كده ملهومش مكان فى دماغك ولا بيشغلو عقلك تماماً, 

وانك تقدر تتعامل مع ستات وبنات عادى جدأ ده لأن عقلك سليم وبيفكر بطريقه سليمه, وربنا يسامح الى ربونا غلط :)