نظرية "الكسل"

-
 "معلومة : "عقلك البشرى مصمم للبحث عن اسرع واقصر طريقه للوصول الهدف

 لكن ايه علاقة عنوان المقاله بالمعلومه الى فوق ديه ؟؟!!..........ده الى هناقشه فى المقاله ديه

 نظرية الكسل هى نظريه كلنا بنقابلها عشرات المرات يوميا وهى ان الشخص يحاول يوصل للهدف بتاعه عن طريق طرق مختصره كتير, فى رايى ده شىء كويس وديه احد مميزات عقلنا زى ما مكتوب فوق لكن الكلام ده لو الطريق المختصر ده هيوصلنا للهدف اصلا

 تعالوا نوضح اكتر نظرية الكسل عن طريق امثله بنعيشها فى حياتنا

 لو اتكلمنا عن الدين : هتلاقى ان فى ناس بتحاول تكسب رضا ربنا بأسهل الطرق زى مثلا انه يعمل شير لدعاء او لأذكار وبدوسه واحده هيكسب مليارات الحسنات ويخش فى سحب الجنه فى الاخره, انا بالنسبالى ديه طريقة تفكير مثاليه بدل موجع دماغى بصلاه وصوم وصدقات وزكاه وقيام ليل وانى اذكر ربنا اصلا ادوس دوسه بالماوس ناس تذكرلى الى انا مش بذكره وانا استغل الوقت ده فى انى اكلم نانسى وسعاد على الشات

فعلا ديه كانت هتبقى طريقه مثاليه لو وصلتنى لهدفى الى هو رضا ربنا, لكن فهمى للدين بيقولى ان ده اخره يوصلنى لخروجه حلوه مع نانسى او سعاد او الاتنين مع بعض
لما نتكلم على الصحه : هتلاقى برضه نفس الناس الى كانو فوق يقعدو مأنتخين طول السنه ويجو قبل الصيف باسبوعين عايزين يبقوا "رونى كولمان" وطبعا هيتجهوا للحل بتاع اللاصقه السحريه وشاى دكتور منج الصينى الى بتخليهم يخسو وهم مأنتخين برضه وباسرع وقت ومن غير تمرين وهياكلو الى هم عايزينو برضه 

 بالنسبالى ديه طريقه تفكير مثاليه برضه بلا تمرين بلا عرق وتعب وقرف ودايت ومش هاكل الى انا عايزه, بس الكلام ده لو كانت هتوصلنى لهدفى الى هو ان انا اعمل جسم شكله كويس, بس الى انا اعرفه ان الطريقه ديه هتوصلك لنتيجه واحده وهى ان شكلك برضه هيفضل وحش وانت على الشط زى كل سنه

 لو اتكلمنا على تطوير الذات : هتلاقى الشخص فاكر نفسه بعد كورس او كتاب هيقراه هيبقى تنيين مجنح ....الخ
علاقتك باهلك فى البيت : تلاقى مفهوم التربيه عندنا هو الزعيق والضرب وطبعا ديه انسب طريقه واسهل طريقه لو كانت هتوصلنا للهدف انك توصل لابنك او بنتك وجهة نظر معينه او تعلمه حاجه, اسهل من انك تعمل الحاجه ديه بنفسك وهو يشوفها فيك وبالتالى هيقلدك او انك تشوف ايه المشاكل الى عنده الى بتخليه ميعملش حاجه زى كده او انك فى الاصل تقرب علاقتك بيه وتبقى صاحبه وتديله وقت من يومك لكن فى الحقيقه كل ده متعب والاسهل انى ازعق تعبيرا عن ضعفى واخد الطريق المختصر كالعاده

 فى شغلك : دايما تلاقى الناس بتتجه للشغل الى عندها موهبه فيه توفيرا للمجهود, ولو ملوش موهبه فى الشغل ده يقول انا متخلقتش للشغل ده وده نوع من الكسل لانه مش عايز يكتسب المهاره حتى عن طريق التمرين والتكرار والتعلم حتى اما بنعمل بحث على اى حاجه دايما بنقول فين اسرع حاجه دايما بندور على حلول سريعه لكن مش بندور على حلول تحقق هدفنا فعلا
 ودلوقتى لو رجعنا للمعلومه الى فوق فعلا ديه من مميزات عقلك لكن لو حددت هدفك فعلا وعرفت ايه الطريقه الى هتوصلك ليه, طريقه فعلا توصلك ليه مش تضحك على نفسك بيها واول اما متحققش هدفك تقعد تعيط وتقول اعمل ايه تانى هو انت عملت ايه اولانى ؟؟

 من الاخر : مفيش طرق مختصره مش هتخس فى اسبوعين الى انت زدته بسبب اهمالك فى خمس سنين, مش هتبقى شخص متميز وواثق من نفسه وحبوب وناجح من كورس تنميه بشريه, مش هتدخل الجنه لو عملت شير للأذكار , مش هتبقى ناجح فى شغلك وانت دايما بتشتكى من مديرك ومش بتحاول تعرف اكتر وتتعلم , مش هتربى ابنك بالعصايه بالعكس هتعلمه يكدب عليك ويبقى مش واثق فى نفسه
بدل كل ده لو عايز فعلا توصل لهدفك خصص وقت من يومك للتمرين وظبط اكلك, اقرى كتير واتعلم اكتر وشارك فى حاجات تنمى مهاراتك, اجتهد فى شغلك وحاول تعرف ايه ناقصك وتظبطه, حسن علاقتك باولادك وعيلتك ودايما اعرف مشاكلهم وساعدهم انهم يحلوها, واظن فى الدين مش محتاج اقولك تعمل ايه ؟؟ 
:D

 قوم يالا هزها
:) 












 

تعليقات

إرسال تعليق

المشاركات الشائعة من هذه المدونة

سليذرن أم جريفندور لأيهما تنتمي ؟!

-
صورة
ملحوظة: إن لم تقرأ أو تشاهد سلسلة هاري بوتر أو أي أجزاء منها، لن تواجه صعوبه في الوصول للرسالة الموجودة داخل هذه التدوينة بل يمكن أن تحثك على قراءة السلسلة أو مشاهدتها أو كلاهما، لكنها قد تُفقدك حس التشويق لما ستفصح عنه من أحداث ، إذا كنت تخطط لقراءة السلسلة وأنت ممن لا يستطيعون الأستمتاع بمشهد مرتين فأنصحك ألا تستأنف القراءة، وربما تقرأ هذه التدوينة بعد قراءة السلسلة؛ أما إذا كنت لا تبالي وتستمتع متى شئت وأينما شئت إذن فاستمتع هنا وهناك.          سليذرين وجريفندور هما اسميْ منزلان، من أربعة منازل تكوِّن مدرسة هوجورتس للسحر، أنشأهما غودريك جريفندور وسالازار سليذرين، وسُميّا على أسميْهما، قبل أن تتصاعد الخلافات بينهما، ويتْرك سالازار المدرسة ويختفي؛ توارثت الأجيال هذا الخلاف، وأصبحت العداوة قائمة، بين كل من ينتمي لكلا المنزلين. رمز سليزرن وجريفندور قُسمت المنازل الأربعة، ونُسب إليها صفات مؤسسيها الأربعة، وأصبح إختيار الطلاب للألتحاق بكل منزل، يعتمد على صفاته أقرب لأي مؤسس؛  رمز جريفندور هو الأسد، وتتباين صفاته في الشجاعة والفروسية والجرأة؛ أما سليذرين ...
قراءة المزيد

الله الفكْرة

-
صورة
                                             طالما أحببت الله كرضيع تطمئنه أمه، تخبرني أن بإمكاني فعل ذلك، أو أنني أستحق الحب، أنني لن أحيا يوماً دون أن أتجشأ من الشبع، أو دون سترة فوق كتفي، كانت هذه اللحظات تمثل سرير دافئ ومريح .. حضن صديق عزيز ..كما تخبرك حبيبتك أن كل شئ على ما يُرام .. عندما يكاد قلبك أن يشق صدرك صارخاً: "إرحمني يا الله .. فقد تعبْتُ اللهاث" .. روحاً أضناها الحِمل .. وكاد أن يفلت منها الزمام .. وما الحمول إلا على الله .. حالفني الحظ كثيراً وقد أعجبتني  فكرة أن الله يدعمني "أنا" ، أنه يخفي لي شيئا مميزاً؛  لكن عميقاً داخل قلبي كانت المُقايضة مُرضية إلى حد قريب، سوف أُتمم طقوسي وتلاواتي، وانت توفِّر لي أسباباً تجعلني أقبل نفسي؛  كنسمة ريح حادة ترضى بها فقط لأنك تصببت عرقاً، أو لتمدح ما ينفعك وتقايضه حريتك .. كحُب أصطنعته لأنك لا تقوى الكره .. ولكنك تكره بالله .. وتلفظ اسماء سميتها .. لا تعني ما عنيته .. طالما تمنيت أن تكون حبكة الحياة بسيطة ...
قراءة المزيد