وهم السعاده

لما بتكلم مع ناس كتير بكتشف حاجه غريبه جدا, سواء عن طريق ان الشخص نفسه يقولى او ان ده يبان من كلامه,

ناس كتير هدفها هو انها تبقى سعيده, ممكن تكون بتقرى المقال ده وتقول فعلا انا هدفى السعاده ازاى ديه حاجه غريبه ؟؟

طب خلينا نفكر بطريقتك ونشوف ايه الى بيحصل,

 اول خطوه بتعملها انك تدور عن محفزات السعاده بالنسبالك وديه ممكن تكون

عن طريق النجاح فى مجال معين او تحقيق هدف معين او انك يبقى عندك كم معين من الفلوس, وتبتدى ساعتها تبذل كل طاقتك فى حاجه زى كده, ممكن متنامش تموت نفسك من كتر التعب كل ده عشان هدفك الاساسى انك تحس بالسعاده

لكن انت نسيت حاجه مهمه نسيت تحسبها, ممكن يكون سبب تحقيق هدفك مثلا سنه شغل وتعب وبهدله وفى الاخر بتحقق هدفك اخرك بتبقى سعيد اسبوع, بعد كده بتتعود على النجاح وبيبقى شىء طبيعى جدا, طب ازاى اضحى بسنه فى مقابل اسبوع او ايا كان دايما هتلاقى تعبك اكتر بكتير من مدة سعادتك المعادله مش مظبوطه ودايما بتخرج خسران

الطريقه التانيه ان يبقى هدفك هو الوصول للسعاده عن طريق الشهوات, الاكل, الجنس , الشهره, الفلوس وساعتها بتتحول لكائن مادى مفيش حاجه بتشبعه والموضوع يتحول عندك لادمان وكل متاخد تبقى عايز اكتر واكتر لان طعم الحاجه بيروح ولازم تزود جرعتها عشان تحس بيها ,وينتهى بيك الامر لجنون الشهوه وكل متاخد اكتر كل متجوع اكتر لحد متوصل للأكتئاب

دول الطريقتين الى انا قابلتهم الى بيحصلو بيها على السعاده والى انا شايفها من وجهة نظرى غريبه, فى المقابل عمرك سالت نفسك احنا ليه بنحط لسعادتنا شرط, ليه سعادتنا مشروطه بفلوس او شهوه معينه او حتى هدف معين ليه دايما بنبقى عبيد لحاجه زى ديه ومن غيرها بننحط فى حفره كبيره من الاكتئاب والحزن وحتى بيها بتبقى السعاده مؤقته

ليه متكونش سعادتنا غير مشروطه, ليه متكونش سعيد على طول مش لازم تحقق هدفك عشان تبقى سعيد مش لازم يبقى عندك قصر عشان تبقى سعيد مع العلم انك حتى لو جبت القصر هتفرح بيه يومين بعد كده هتتعود عليه, ليه متكونش اى حاجه بتحصلك هيه مصدر سعادتك, جدد حبك لاهلك الى عايشين معاك فى البيت كل يوم هتحس انك سعيد فرحهم دايما هتبقى سعيد, فرح اصحابك هتبقى سعيد اخرج بره قيد السعاده المشروطه بحاجات ماديه, انت عندك القدره انك تبقى سعيد

قرر انك تبقى سعيد فى كل وقت وكل مكان ومهما كانت ظروفك, اعرف حد اما كان بيبقى فى المترو والدنيا زحمه وريحه المترو كلو عارفها وواحد دايس على جزمته وهدومه الى كاويها اتكرمشت ومش قادر يتنفس كان بيتخيل نفسه فى الوضع ده ويضحك على نفسه هو اختار يبقى سعيد

انت اخترت ايه ؟؟؟

:)